Hukumar Shirya Jarabawar Shiga Jami’o’i ta Najeriya, JAMB, ta bullo da sabon tsarin da zai bai wa ɗalibai damar tantancewa da kuma loda sakamakon jarabawarsu ta O’Level daga gidajensu, inda aka fara da sakamakon da Hukumar WAEC ke fitarwa.
A cewar wata sanarwa da mai magana da yawun JAMB, Dr Fabian Benjamin, ya fitar, sabon tsarin zai samar wa ɗalibai wata hanya mafi sauƙi ta kammala aikin, musamman a lokutan da ake samun cunkoso da matsalolin sadarwar intanet a cibiyoyin CBT.
Hukumar ta ce ƙaddamar da tsarin na daga cikin ƙoƙarinta na sauƙaƙa ayyukanta, da sa su zama cikin sauri, aminci da sauƙin amfani, tare da rage yawan ziyartar cibiyoyin CBT ba tare da buƙata ba, dogayen layuka da kuma amfani da hanyoyin hannu wajen shigar da bayanai.
JAMB ta ce tsarin zai kuma taimaka wajen magance matsalolin da ke tattare da loda sakamakon O’Level da hannu, ciki har da ɓacewa ko cakudewar takardun sakamako, amfani da sakamakon da ba a tantance sahihancinsa ba ko na bogi, da kuma kuskuren shigar da darussa da maki.
Ta hanyar haɗa tsarin JAMB e-Facility da tsarin hukumomin da ke shirya jarabawa, yanzu za a iya tantance sakamakon ɗalibai kai tsaye da bayanan hukuma kafin a sauke sakamakon.
Hukumar ta ce sabon tsarin zai ƙara inganta sahihancin bayanan ɗalibai tare da rage kuskure da jinkiri wajen kammala hanyoyin neman gurbin karatu.