Ƙwallon “Hand of God” na Maradona ya samu mai siya kan £2.5m

Ƙwallon da fitaccen ɗan wasan Argentina, Diego Maradona, ya zura shahararren ƙwallonsa na “Hand of God” a gasar cin kofin duniya ta 1986, ya samu mai siya a gwanjo kan fam miliyan 2.5.

Maradona ya zura ƙwallon da hannunsa ta wuce mai tsaron ragar Ingila, Peter Shilton, a wasan daf da na kusa da na ƙarshe da Argentina ta doke Ingila da ci 2-1.

Bayan wasan, Maradona ya shaida wa manema labarai cewa ƙwallon ta fito ne daga “kan Maradona, ɗan kuma daga hannun Allah”, kalmar da daga baya ta sa aka yi wa ƙwallon laƙabin “Hand of God”.

A wannan wasan ne kuma Maradona ya sake zura ƙwallon da aka fi sani da “Goal of the Century”, bayan ya yi yanka tare da kauce wa ‘yan wasan Ingila biyar kafin ya tura ƙwallon cikin raga ta hannun Shilton.

An sayar da ƙwallon kan dala miliyan 3.3, kwatankwacin fam miliyan 2.5, a gwanjon Heritage da aka gudanar a Amurka ranar Asabar.

Kafin gwanjon, an yi hasashen cewa ƙwallon na iya kaiwa dala miliyan 10, wato kusan fam miliyan 7.3.

Da yake magana da kamfanin dillancin labarai na Reuters kafin gwanjon, Mike Provenzale, wani ƙwararren mai gudanar da gwanjo a Heritage, ya ce ƙwallon na daga cikin abubuwan tarihi mafi muhimmanci a duniyar ƙwallon ƙafa.

Ya ce: “Wannan abu ne na musamman da babu irinsa. Ana iya cewa shi ne mafi muhimmancin abin tunawa da ya shafi ƙwallon ƙafa da ake da shi a duniya.”

Alƙalin wasan na Tunisiya, Ali Bin Nasser, shi ne ya karɓi ƙwallon Adidas Azteca bayan kammala wasan, inda ya adana ta tsawon sama da shekaru 30.

A shekarar 2023, Bin Nasser ya rattaba hannu kan wata takarda da ta tabbatar da cewa wannan ce ƙwallon da aka yi amfani da ita a dukkan wasan. Haka kuma, wasu masu bincike masu zaman kansu sun tabbatar da sahihancinta.

Bin Nasser ya sayar da ƙwallon a shekarar 2022 kan dala miliyan 2.37, kwatankwacin fam miliyan 1.74.

Daga baya sabon mamallakin ya sake fitar da ƙwallon gwanjo a shekarar 2023, amma ba a samu mai siya ba, saboda tayin da aka yi bai kai mafi ƙarancin farashin da aka sanya ba.

Rigar da Maradona ya sanya a wannan wasan ita ma an sayar da ita a gwanjo a shekarar 2022 kan fam miliyan 7.1.