Farashin ɗanyen man Brent ya haura dala 100 kan kowace ganga a kasuwar duniya a yau Laraba, karo na farko tun ranar 24 ga Yuli, yayin da rikicin Gabas ta Tsakiya ke ƙara tsananta.
A safiyar yau, farashin Brent ya kai dala 100.07 kan ganga, bayan ƙarin dala 2.15, kwatankwacin kashi 2.2 cikin 100. Farashin man Amurka na WTI kuma ya tashi zuwa dala 94.73 kan ganga.
Farashin mai ya ƙaru da kusan kashi 25 cikin 100 tun farkon watan Agusta, sakamakon fargabar samun cikas ga samarwa da jigilar ɗanyen mai daga yankin Gabas ta Tsakiya.
Harin da mayaƙan Houthi masu samun goyon bayan Iran suka kai kan wasu cibiyoyin makamashi a Saudiyya a wannan makon ya haddasa gobara a wasu wuraren mai, lamarin da ya ƙara fargabar katsewar hanyoyin jigilar ɗanyen mai.
Rahoton Reuters ya ce hare-haren na iya yin barazana ga jigilar mai ta Tekun Maliya, wadda ta kasance wata muhimmiyar hanya ta daban da mashigar Hormuz, inda jigilar ɗanyen mai ta ragu matuka sakamakon rikicin yankin.
Masana harkar makamashi na gargadin cewa idan rikicin ya ci gaba da shafar manyan hanyoyin jigilar mai, farashin na iya ci gaba da tashi, lamarin da ka iya ƙara matsin farashin makamashi da hauhawar farashin kayayyaki a duniya.