An ji wata babbar ƙarar fashewa a filin jirgin saman ƙasa da ƙasa na Riyadh, babban birnin Saudiyya, a daidai lokacin da ake samun rahotannin ƙaruwa da hare-haren makamai masu linzami da ake dangantawa da ƙungiyar Houthi ta Yemen.
Ya zuwa yanzu, hukumomin Saudiyya ba su tabbatar da cewa an kai hari a filin jirgin saman ba. Sai dai rahotannin farko sun nuna cewa an fara kwashe mutane daga filin jirgin.
Kamfanonin jiragen sama na Etihad Airways da Qatar Airways sun soke wasu jirage da dama da za su tashi zuwa Riyadh, ciki har da wasu da aka tsara gudanarwa har zuwa ranar Litinin.
Wannan na zuwa ne bayan wasu hare-hare da aka kai a farkon makon, waɗanda rahotanni suka ce sun yi sanadiyyar mutuwar mutane huɗu tare da lalata wani jirgin saman Saudiyya.
A wani ɓangare kuma, a Yemen, jami'an soji sun bayyana cewa dakarun gwamnatin ƙasar na ci gaba da matsa wa mayaƙan Houthi lamba a kusa da mashigin ruwan Bab al-Mandab, wanda ke da muhimmanci wajen zirga-zirgar jiragen ruwa da jigilar makamashi a duniya.
Sai dai kafafen yaɗa labarai masu alaƙa da ƙungiyar Houthi sun yi ikirarin cewa mayaƙan ƙungiyar sun dakile harin da aka kai musu.
Har yanzu dai ana jiran ƙarin bayani daga hukumomin Saudiyya kan musabbabin ƙarar fashewar da aka ji a filin jirgin saman Riyadh.