Fiye da wata biyu bayan sace ɗalibai daga makarantu uku da ke garin Mussa a Jihar Borno, har yanzu iyaye da iyalansu na ci gaba da jiran ganin an kuɓutar da 'ya'yansu.

Lamarin ya sake nuna irin ƙalubalen tsaro da Najeriya ke fuskanta, musamman yawaitar sace ɗalibai daga makarantu, duk da ƙoƙarin da gwamnati ta ce tana yi na magance matsalar tsaro.

A cikin 'yan shekarun nan, masu garkuwa da mutane sun ƙara kai hare-hare kan makarantu a sassa daban-daban na ƙasar, lamarin da ke ci gaba da jefa ɗalibai da iyayensu cikin fargaba.

A ranar 10 ga Yulin 2026, gwamnatin tarayya ta sanar da ceto wasu ɗalibai da malamansu da aka sace a Jihar Oyo, bayan sun shafe kwanaki 56 a hannun masu garkuwa da su. An sace su ne daga makarantarsu da ke Ƙaramar Hukumar Oriire a yankin Ogbomoso.

A nata ɓangaren, Gwamnatin Jihar Borno ta bayyana cewa tana aiwatar da matakai uku domin tabbatar da kuɓutar da ɗaliban da aka sace a garin Mussa.

Sai dai gwamnatin ba ta bayyana cikakken bayani kan waɗannan matakan ba, tana mai cewa ana ci gaba da aiki tare da hukumomin tsaro domin ganin an ceto yaran cikin ƙoshin lafiya.

Iyaye da mazauna yankin sun ci gaba da kira ga gwamnati da jami'an tsaro da su ƙara ƙaimi wajen ceto ɗaliban tare da ɗaukar matakan da za su hana aukuwar irin wannan lamari a nan gaba.