Neymar ya yi arangama da ɗan Robinho a karon farko da suka haɗu a filin atisayen Santos FC

Neymar ya samu saɓani da Robinho Junior yayin wani atisaye da Santos FC ta gudanar, kamar yadda rahotanni daga Brazil suka bayyana.

Rahotannin sun ce Neymar mai shekaru 34 ya yi sa-in-sa da matashin ɗanwasan mai shekaru 18 bayan da ya zarge shi da yi masa yanka na raini a filin wasa. An ce lamarin ya kai har Neymar ya mari Robinho Junior, abin da ya jawo tunkuɗe-tunkuɗe tsakaninsu kafin daga bisani aka shiga tsakani.

Daga baya Neymar ya huce tare da bai wa matashin ɗanwasan haƙuri, sai dai wasu rahotanni na cewa Robinho Junior bai gamsu ba, inda mashawartansa ke son ƙungiyar ta fitar da sanarwa kan abin da ya faru.

Robinho, mahaifin matashin ɗanwasan, ya taɓa buga wa Santos FC da kuma Real Madrid CF da Manchester City FC da AC Milan da kuma İstanbul Başakşehir FK.

A halin yanzu Santos na fama da matsalar rashin sakamako mai kyau, inda ƙungiyar ke mataki na 16 a teburin gasar Serie A ta Brazil. Duk da cewa Neymar bai buga wasanni biyu na ƙarshe ba, ya ci ƙwallo huɗu tare da bayar da taimakon ƙwallo uku a wasanni 11 da ya buga kawo yanzu.

Har ila yau, Neymar na fatan samun gurbi a tawagar Brazil national football team domin taka leda a gasar 2026 FIFA World Cup da za a gudanar a United States da Mexico da kuma Canada.