Pep Guardiola ne kocin mafi fice a wannan tsaran – In ji Wayne Rooney

Tsohon kyaftin din kungiyar kwallon kafa ta kasar Ingila, Wayne Rooney, ya bayyana kocin Manchester City, Pep Guardiola, a matsayin "Sir Alex Ferguson na wannan zamanin," inda ya jinjina masa kan irin mamayar da ya yi a fagen kwallon kafa na Ingila.

Da yake jawabi a shirin "Wayne Rooney Show" na kafar yada labarai ta BBC a ranar Talata, Rooney ya kwatanta nasarorin da Guardiola ya samu a City da irin wadanda tsohon kocinsa, Alex Ferguson, ya samu a Manchester United, wanda Rooney ya buga wa wasa a karkashinsa tsakanin shekarar 2004 zuwa 2013.

"Na ga ana yawan kwatanta shi da Alex Ferguson," in ji Rooney. "Zan iya cewa Ferguson ne kocin mafi fice a kowane lokaci (Greatest of All Time), amma tabbas Pep, a wannan tsaran nasa, shi ne mafi kyau nesa ba kusa ba."

Ana sa ran Guardiola zai bar kungiyar Manchester City a karshen kakar wasa ta bana bayan ya shafe shekaru 10 a kulob din.

A tsawon lokacin da ya yi a City, kocin na kasar Sipaniya ya lashe kofuna 20, wadanda suka hada da kofunan Premier guda shida, gasar zakarun Turai (UEFA Champions League), kofunan FA guda uku, da kuma kofunan EFL guda biyar.

A gefe guda kuma, Ferguson ya kasance kocin da ya fi kowa samun nasara a tarihin gasar Premier da kofunan lig guda 13 a cikin shekaru 26 da ya yi yana jan ragamar Manchester United.

Rooney ya amince da irin amaci da jimawa da Guardiola ya yi a City, amma ya jaddada cewa tarihin Ferguson a United ya kasance abin mamaki kwarai da gaske.

"Ina kallon mutane suna fadin irin nuna amaci da ya yi na tsawon shekaru 10, wanda hakan abin mamaki ne. Amma Alex Ferguson ya yi shekaru 26," Rooney ya kara da cewa. "Idan ka yi tunanin wannan tsawon lokaci, shekaru 26 a kulob guda na kwallon kafa, abin ban mamaki ne kwarai da gaske."

Tsohon dan wasan gaban ya kuma bayyana bambancin yanayin da kocin guda biyu suka fuskanta sa'ilin da suka karbi ragamar kungiyoyinsu.

"Lokacin da Sir Alex ya karbi ragamar United, lamarin ya kasance na daban baki daya," in ji Rooney. "Kusan sai da ya sake gina kulob din tun daga tushe domin su dawo su zama masu karfi da nasara a kwallon kafar Ingila — yayin da nake ganin shi Pep bai bukaci yin hakan ba lallai."

Duk da wannan bambanci, Rooney ya jinjina wa nasarorin da Guardiola ya samu a City.

"Amma abin da ya yi ta fuskar nuna cikakken iko da mamaya na gaba daya... ba abin da za a raina ba ne," in ji shi.