An kai wa jami’an diflomasiyya hari a Yammacin Kogin Jordan

Jami’an diflomasiyyar sun ziyarci ƙauyen ne domin tantance halin da ake ciki, bayan rahotannin hare-hare da matsugunan Isra’ila ke kai wa manoman Falasɗinawa yayin girbin zaitun.

Rahotanni sun ce wasu mazauna matsugunan da suka rufe fuskokinsu sun tare ayarin motocin jami’an diflomasiyyar.

Mahukuntan Belgium sun bayyana cewa an fasa gilashin wata mota da ke ɗauke da babban jakadan ƙasar a yankin. Haka kuma, an kai hari ga wani magajin gari daga Faransa.

Ministan Harkokin Wajen Belgium ya yi Allah wadai da harin, inda ya buƙaci Isra’ila ta tabbatar da cewa an gudanar da bincike mai inganci tare da gurfanar da waɗanda ake zargi da hannu a lamarin a gaban shari’a.

A nata ɓangaren, rundunar sojin Isra’ila ta yi Allah wadai da abin da ya faru, tare da sanar da cewa ta fara gudanar da bincike domin gano cikakken bayani kan lamarin.

Harin ya sake jawo hankalin duniya kan matsalar tsaro da kuma rikicin da ke shafar Falasɗinawa a Yammacin Kogin Jordan da aka mamaye.